சீனா தான் இதற்கு காரணம்...! மதுரை ஆதீனம் ஆவேசம்..!

by Vignesh Perumal on | 2025-04-27 04:44 PM

Share:

சீனா தான் இதற்கு காரணம்...! மதுரை ஆதீனம் ஆவேசம்..!

மதுரை ஆதீனம் ஸ்ரீலஸ்ரீ ஹரிஹர தேசிக ஞானசம்பந்த பரமாச்சாரிய சுவாமிகள், காஷ்மீரில் நடைபெற்ற பயங்கரவாத தாக்குதல் விவகாரத்தில் பாகிஸ்தானை சர்வதேச அளவில் தனிமைப்படுத்த வேண்டும் என்று வலியுறுத்தியுள்ளார். மேலும், இந்த தாக்குதலுக்கு சீனாதான் காரணம் என்றும் அவர் குற்றம் சாட்டியுள்ளார்.

மதுரையில் இன்று செய்தியாளர்களிடம் பேசிய மதுரை ஆதீனம், "காஷ்மீரில் அப்பாவி மக்கள் மீது நடத்தப்பட்ட இந்த கோழைத்தனமான தாக்குதல் வன்மையாக கண்டிக்கத்தக்கது. இதற்கு காரணமான பாகிஸ்தானை உலக நாடுகள் ஒற்றுமைப்படுத்த வேண்டும். பயங்கரவாதத்தை ஊக்குவிக்கும் எந்த நாட்டையும் அனுமதிக்கக் கூடாது" என்று கூறினார்.

மேலும், "இந்த பயங்கரவாத தாக்குதலுக்கு பின்னணியில் சீனா உள்ளது. பாகிஸ்தானுக்கு ஆயுத உதவிகளையும், பயங்கரவாத பயிற்சி அளிப்பதையும் சீனா நிறுத்திக்கொள்ள வேண்டும். சீனாவின் இந்த செயலை உலக நாடுகள் கண்டிக்க வேண்டும்" என்றும் அவர் தெரிவித்தார்.

வக்பு வாரிய சொத்துக்கள் தொடர்பான சர்ச்சைகள் குறித்து பேசிய மதுரை ஆதீனம், "வக்புக்காக போராடுபவர்கள், காஷ்மீரில் அப்பாவி மக்கள் கொல்லப்பட்டது குறித்து ஏன் வாய் திறப்பதில்லை? அவர்கள் மதத்தின் பெயரால் மட்டுமே போராடுகிறார்களா?" என்று கேள்வி எழுப்பினார். பாகிஸ்தானை கடுமையாக விமர்சித்த அவர், "பாகிஸ்தான் ஒரு மதக்கலவர பூமி. அங்கு சிறுபான்மையினர் தொடர்ந்து துன்புறுத்தப்படுகிறார்கள். இந்தியா சிந்து நதி நீரை பாகிஸ்தானுக்கு வழங்கக்கூடாது. நமது நாட்டின் வளத்தை பயங்கரவாதத்தை ஆதரிக்கும் நாட்டிற்கு கொடுப்பது சரியல்ல" என்றார்.

பிரதமர் மோடியின் நடவடிக்கைகளுக்கு தனது ஆதரவை தெரிவித்த மதுரை ஆதீனம், "பிரதமர் மோடி இந்த பயங்கரவாத தாக்குதலுக்கு சரியான பதிலடி கொடுப்பார் என்ற நம்பிக்கை எனக்கு உள்ளது. பாகிஸ்தான் மற்றும் சீனாவை உலக நாடுகள் ஒதுக்கி வைக்க வேண்டும். அப்போதுதான் பயங்கரவாதத்திற்கு ஒரு முடிவு கட்ட முடியும்" என்று தனது கருத்தை தெரிவித்தார். மதுரை ஆதீனத்தின் இந்த கருத்துக்கள் தேசிய அளவில் ஈர்த்துள்ளன. அவரது காட்டமான விமர்சனங்கள் மற்றும் பாகிஸ்தான், சீனா மீது அவர் சுமத்தியுள்ள குற்றச்சாட்டுகள் விவாத பொருளாக மாறியுள்ளன.

தலைமை செய்தியாளர்-பா.விக்னேஷ்பெருமாள்.

WhatsApp Group Join Now