வனத்துறையினர் அலட்சியம்...! பொதுமக்கள் அவதி...!

by Vignesh Perumal on | 2025-04-27 11:05 AM

Share:

வனத்துறையினர் அலட்சியம்...! பொதுமக்கள் அவதி...!

திண்டுக்கல் மாவட்டம் கொடைக்கானல் பேருந்து நிலையத்தில் நடமாடும் காட்டுமாடுகளால் பயணிகள் அச்சமடைந்துள்ளனர். பொதுமக்கள் அதிகளவில் வந்து செல்லும் இந்த பேருந்து நிலையத்தில் இன்று காட்டுமாடு ஒன்று சர்வ சாதாரணமாக நடந்து சென்றது.

சுற்றுலாப் பயணிகள் மற்றும் உள்ளூர் மக்கள் அதிகளவில் கூடும் கொடைக்கானல் பேருந்து நிலையத்தில் காட்டுமாடுகள் அடிக்கடி நடமாடுவது வாடிக்கையாகி வருகிறது. இன்று ஒரு காட்டுமாடு பேருந்து நிலையத்திற்குள் நுழைந்து அங்குமிங்கும் சுற்றித் திரிந்ததால் பயணிகள் அதிர்ச்சியடைந்தனர். பலரும் இது வளர்ப்பு மாடு என்று நினைத்து சாதாரணமாக இருந்த நிலையில், காட்டுமாடுகளின் இயல்பு தெரியாததால் பயணிகள் தாக்கப்படும் அபாயம் ஏற்பட்டுள்ளது.

சமூக ஆர்வலர்கள் இதுகுறித்து கவலை தெரிவித்துள்ளனர். இதுபோன்ற அசாதாரணமான சூழலில், காட்டுமாடுகளை வளர்ப்பு மாடுகள் என நினைத்து பயணிகள் நெருங்கிச் செல்லும் போது அவை தாக்கக்கூடும். இதனால், வனத்துறையினர் உடனடியாக தலையிட்டு நகருக்குள் சுற்றித் திரியும் காட்டுமாடுகளை வனப்பகுதிக்குள் விரட்டியடிக்க நடவடிக்கை எடுக்க வேண்டும் என்று அவர்கள் கோரிக்கை விடுத்துள்ளனர்.

கொடைக்கானல் மலைப்பகுதியில் இருந்து உணவு தேடி வரும் காட்டுமாடுகள் குடியிருப்பு பகுதிகள் மற்றும் பேருந்து நிலையம் போன்ற மக்கள் நடமாட்டம் மிகுந்த இடங்களில் புகுவது தொடர்கதையாகி வருகிறது. இதனால், பொதுமக்களின் இயல்பு வாழ்க்கை பாதிக்கப்படுவதுடன், அவர்களின் உயிருக்கும் ஆபத்து ஏற்படும் சூழல் நிலவுகிறது.

எனவே, வனத்துறையினர் இப்பிரச்சனைக்கு நிரந்தர தீர்வு காணும் வகையில், காட்டுமாடுகள் நகருக்குள் வருவதை தடுக்க தீவிர ரோந்து பணிகளை மேற்கொள்ள வேண்டும். மேலும், பிடிபடும் காட்டுமாடுகளை அடர்ந்த வனப்பகுதிக்குள் கொண்டு சென்று விட வேண்டும் என்றும் சமூக ஆர்வலர்கள் வலியுறுத்தியுள்ளனர். சுற்றுலாப் பயணிகள் மற்றும் பொதுமக்களின் பாதுகாப்பை உறுதிப்படுத்த வனத்துறை விரைந்து நடவடிக்கை எடுக்க வேண்டியது அவசியமாகும்.

தலைமை செய்தியாளர்-பா.விக்னேஷ்பெருமாள்.

WhatsApp Group Join Now