தங்கக் கடத்தல் வழக்கில் ஜாமீன் மறுப்பு...! நீதிபதி அதிரடி உத்தரவு...!

by Vignesh Perumal on | 2025-04-26 05:00 PM

Share:

தங்கக் கடத்தல் வழக்கில் ஜாமீன் மறுப்பு...! நீதிபதி அதிரடி உத்தரவு...!

கர்நாடக உயர் நீதிமன்றம், தங்கக் கடத்தல் வழக்கில் கன்னட நடிகை ரன்யா ராவுக்கு ஜாமீன் வழங்க மறுத்துவிட்டது. 12.56 கோடி ரூபாய் மதிப்பிலான தங்கக் கடத்தல் வழக்கில் ரன்யா ராவு மற்றும் அவருடன் குற்றம் சாட்டப்பட்ட தருண் கொண்டூரு ராஜு ஆகியோரின் ஜாமீன் மனுக்களை நீதிபதி எஸ். விஸ்வஜித் ஷெட்டி தள்ளுபடி செய்து உத்தரவிட்டார்.

ரன்யா ராவு கடந்த மார்ச் 3ஆம் தேதி பெங்களூரு கெம்பேகவுடா சர்வதேச விமான நிலையத்தில் 2.49 கிலோ தங்கக் கட்டிகளுடன் பிடிபட்டார். இதையடுத்து, அவரது வீட்டில் நடத்திய சோதனையில் 2.06 கோடி ரூபாய் மதிப்பிலான தங்க நகைகள் மற்றும் 2.67 கோடி ரூபாய் ரொக்கம் பறிமுதல் செய்யப்பட்டது.

முன்னதாக, விசாரணை நீதிமன்றமும் ரன்யா ராவுக்கு ஜாமீன் வழங்க மறுத்துவிட்டது குறிப்பிடத்தக்கது. இந்த வழக்கில், சுங்கச் சட்டத்தின் பல்வேறு பிரிவுகளின் கீழ் ரன்யா ராவு மற்றும் தருண் ராஜ் மீது குற்றம் சாட்டப்பட்டுள்ளது.

ரன்யா ராவு, கர்நாடக டிஜிபி கே. ராமச்சந்திர ராவின் வளர்ப்பு மகள் ஆவார். இந்த வழக்கில், ரன்யா ராவுக்கு விமான நிலையத்தில் உதவி செய்ததாகக் கூறப்படும் போலீஸ் அதிகாரி தொடர்பாகவும் விசாரணை நடைபெற்று வருகிறது. மேலும், இந்த வழக்கை அமலாக்க இயக்குனரகம் (ED) மற்றும் மத்திய புலனாய்வுப் பிரிவு (CBI) ஆகியவையும் விசாரித்து வருகின்றன.

சமீபத்திய தகவல்களின்படி, ரன்யா ராவு மற்றும் இந்த வழக்கில் தொடர்புடைய மற்ற இருவரான தருண் ராஜு மற்றும் சாஹில் சக்காரியா ஜெயின் ஆகியோர் மீது COFEPOSA (Conservation of Foreign Exchange and Prevention of Smuggling Activities Act, 1974) சட்டமும் பாய்ந்துள்ளது. இதன் காரணமாக, அவர்கள் ஒரு வருடத்திற்கு ஜாமீன் பெற வாய்ப்பில்லை என்று கூறப்படுகிறது. ஜாமீனில் வெளிவந்தால் மீண்டும் கடத்தல் போன்ற செயல்களில் ஈடுபடலாம் என்ற நோக்கத்தில் இந்த நடவடிக்கை எடுக்கப்பட்டுள்ளதாக அதிகாரிகள் தெரிவித்தனர். மேலும், விசாரணைக்கு அவர்கள் ஒத்துழைப்பு வழங்காததும் இதற்குக் காரணம் என்று சொல்லப்படுகிறது.

தலைமை செய்தியாளர்-பா.விக்னேஷ்பெருமாள்.

WhatsApp Group Join Now