விரைவில் ஆசிரியர்கள் தேர்வு..! அமைச்சர் அன்பில் மகேஷ் பொய்யாமொழி புதிய தகவல் வெளியீடு..!

by Vignesh Perumal on | 2025-04-25 01:03 PM

Share:

விரைவில் ஆசிரியர்கள் தேர்வு..! அமைச்சர் அன்பில் மகேஷ் பொய்யாமொழி புதிய தகவல் வெளியீடு..!

தமிழக பள்ளிக்கல்வித் துறை அமைச்சர் அன்பில் மகேஷ் பொய்யாமொழி இன்று (ஏப்ரல் 25, 2025) மதுரையில் செய்தியாளர்களிடம் பேசுகையில், விரைவில் 1,915 முதுநிலை பட்டதாரி ஆசிரியர்கள் மற்றும் 1,205 பட்டதாரி ஆசிரியர்கள் என மொத்தம் 3,120 ஆசிரியர்கள் தேர்வு செய்யப்பட உள்ளதாக தெரிவித்தார்.

அமைச்சர் மேலும் கூறுகையில், தமிழக அரசு பள்ளிகளில் மாணவர் சேர்க்கை தொடர்ந்து அதிகரித்து வருகிறது. கடந்த மார்ச் 1-ம் தேதி முதல் நேற்று (ஏப்ரல் 24) வரை, ஒரு லட்சத்து 56 ஆயிரத்து 290 மாணவர்கள் புதிதாக அரசு பள்ளிகளில் சேர்ந்துள்ளனர். மாணவர்களின் இந்த அதிகரித்த எண்ணிக்கைக்கு ஏற்ப ஆசிரியர்களின் எண்ணிக்கையையும் உயர்த்த வேண்டியது அவசியமாகிறது.

இதன் காரணமாக, பள்ளிக்கல்வித் துறை புதிய ஆசிரியர்களை நியமிக்க முடிவு செய்துள்ளது. விரைவில் இதற்கான அறிவிப்பு வெளியிடப்படும். தகுதி வாய்ந்த பட்டதாரிகள் இந்த வாய்ப்பை பயன்படுத்திக் கொள்ளுமாறு அமைச்சர் அன்பில் மகேஷ் பொய்யாமொழி கேட்டுக்கொண்டார்.

அரசு பள்ளிகளில் மாணவர் சேர்க்கை அதிகரித்திருப்பது அரசு பள்ளிகளின் மீது மக்கள் வைத்துள்ள நம்பிக்கையை காட்டுவதாக அமைச்சர் குறிப்பிட்டார். மேலும், அரசு பள்ளிகளின் தரத்தை உயர்த்தவும், மாணவர்களுக்கு சிறந்த கல்வியை வழங்கவும் தமிழக அரசு தொடர்ந்து பல்வேறு நடவடிக்கைகளை எடுத்து வருவதாகவும் அவர் தெரிவித்தார். புதிய ஆசிரியர்கள் நியமனம் அரசு பள்ளிகளின் கல்வித் தரத்தை மேலும் மேம்படுத்த உதவும் என்று எதிர்பார்க்கப்படுகிறது.

தலைமை செய்தியாளர்-பா.விக்னேஷ்பெருமாள்.

WhatsApp Group Join Now