அனைத்து மகளிர் காவல் நிலைய ஆய்வாளர், எழுத்தர் போக்சோ வழக்கில் சஸ்பெண்ட்...!

by Vignesh Perumal on | 2025-04-25 12:09 PM

Share:

அனைத்து மகளிர் காவல் நிலைய ஆய்வாளர், எழுத்தர் போக்சோ வழக்கில் சஸ்பெண்ட்...!

கடலூர் மாவட்டம் விருத்தாச்சலம் அனைத்து மகளிர் காவல் நிலைய ஆய்வாளர் ஜெயலட்சுமி மற்றும் அதே காவல் நிலையத்தில் எழுத்தராக பணிபுரியும் தலைமைக்காவலர் சிவசக்தி ஆகியோர் போக்சோ வழக்கில் பணம் பெற்றதாக எழுந்த புகாரையடுத்து சஸ்பெண்ட் செய்யப்பட்டுள்ளனர்.

விருத்தாச்சலம் அனைத்து மகளிர் காவல் நிலையத்தில் போக்சோ வழக்கு ஒன்று விசாரிக்கப்பட்டு வந்தது. இந்த வழக்கில் விசாரணைக்காக அழைத்து வரப்பட்டவர்களை விடுவிக்க காவல் நிலைய ஆய்வாளர் ஜெயலட்சுமி பணம் வாங்கியதாக புகார் எழுந்தது. மேலும், இந்த வழக்கில் சம்பந்தம் இல்லாத நபர்களையும் விடுவிக்க அவர் லஞ்சம் பெற்றதாக கூறப்படுகிறது.

இந்த புகார்கள் குறித்து கடலூர் மாவட்ட காவல் கண்காணிப்பாளர் ஜெயக்குமாருக்கு தகவல் சென்றது. இதையடுத்து, மாவட்ட எஸ்.பி. ஜெயக்குமார் உடனடியாக விசாரணை நடத்த உத்தரவிட்டார். முதற்கட்ட விசாரணையில் ஆய்வாளர் ஜெயலட்சுமி மற்றும் தலைமைக்காவலர் சிவசக்தி ஆகியோர் பணம் பெற்றது உண்மை என தெரியவந்தது.

இதையடுத்து, கடலூர் மாவட்ட காவல் கண்காணிப்பாளர் ஜெயக்குமார் அதிரடி நடவடிக்கை மேற்கொண்டு, அனைத்து மகளிர் காவல் நிலைய ஆய்வாளர் ஜெயலட்சுமி மற்றும் எழுத்தர் தலைமைக்காவலர் சிவசக்தி ஆகிய இருவரையும் உடனடியாக சஸ்பெண்ட் செய்து உத்தரவிட்டார்.

இந்த சம்பவம் விருத்தாச்சலம் காவல் வட்டாரத்தில் பெரும் பரபரப்பை ஏற்படுத்தியுள்ளது. போக்சோ போன்ற முக்கியமான வழக்கில் காவல் அதிகாரிகளே லஞ்சம் பெற்றது அதிர்ச்சியை ஏற்படுத்தியுள்ளது. சஸ்பெண்ட் செய்யப்பட்ட இருவர் மீதும் துறை ரீதியான விசாரணை தொடர்ந்து நடைபெறும் என்றும், குற்றச்சாட்டுகள் உறுதியானால் அவர்கள் மீது மேலும் கடுமையான நடவடிக்கை எடுக்கப்படும் என்றும் காவல்துறை வட்டாரங்கள் தெரிவித்துள்ளன.

நீதி கிடைக்க வேண்டிய போக்சோ வழக்கில் பணம் பெற்று முறைகேடு செய்த காவல் அதிகாரிகள் மீது எடுக்கப்பட்ட இந்த நடவடிக்கை பொதுமக்களிடையே வரவேற்பை பெற்றுள்ளது. காவல்துறையில் இதுபோன்ற ஊழல் செய்பவர்கள் மீது கடும் நடவடிக்கை எடுக்கப்பட வேண்டும் என்று சமூக ஆர்வலர்கள் வலியுறுத்தி வருகின்றனர்.

தலைமை செய்தியாளர்-பா.விக்னேஷ்பெருமாள்.

WhatsApp Group Join Now