5 நாள் போராட்டத்திற்குப் பின் பெற்றோரிடம் ஒப்படைப்பு...! அமைச்சர் நேரு நேரில் அஞ்சலி...!

by Vignesh Perumal on | 2025-08-01 11:27 AM

Share:

5 நாள் போராட்டத்திற்குப் பின் பெற்றோரிடம் ஒப்படைப்பு...! அமைச்சர் நேரு நேரில் அஞ்சலி...!

காதல் விவகாரத்தில் படுகொலை செய்யப்பட்ட ஐ.டி. ஊழியர் கவின் உடலை வாங்க மறுத்து அவரது உறவினர்கள் ஐந்து நாட்களாகப் போராட்டம் நடத்தி வந்த நிலையில், இன்று அவரது உடல் பெற்றோரிடம் ஒப்படைக்கப்பட்டது. இச்சம்பவம் தொடர்பாக காவல் உதவி ஆய்வாளர்கள் சரவணன் மற்றும் கிருஷ்ணவேணி ஆகியோர் பணியிடை நீக்கம் செய்யப்பட்ட நிலையில், அமைச்சர்கள் மற்றும் அதிகாரிகள் அஞ்சலி செலுத்திய பின்னர் உடல் ஒப்படைக்கப்பட்டது.

கவின் ஆணவக்கொலை செய்யப்பட்ட வழக்கில், சுர்ஜித் என்ற இளைஞரின் பெற்றோர்களான காவல் உதவி ஆய்வாளர்கள் சரவணன் மற்றும் கிருஷ்ணவேணி ஆகியோரின் தூண்டுதல் இருப்பதாகக் கவின் குடும்பத்தினர் குற்றம்சாட்டினர். அவர்களைக் கைது செய்து விசாரிக்கும் வரை உடலை வாங்க மாட்டோம் எனக்கூறி, கடந்த ஐந்து நாட்களாகச் சட்டப் போராட்டத்தை முன்னெடுத்தனர்.

கவின் உடல் திருநெல்வேலி அரசு மருத்துவக் கல்லூரி மருத்துவமனை சவக்கிடங்கில் வைக்கப்பட்டிருந்தது. இந்த விவகாரம் அரசியல் களத்தில் பெரும் பரபரப்பை ஏற்படுத்திய நிலையில், கவின் குடும்பத்தினருடன் காவல் துறையினர் தொடர்ந்து பேச்சுவார்த்தை நடத்தினர். சரவணன் மற்றும் கிருஷ்ணவேணி இருவரும் ஏற்கனவே பணியிடை நீக்கம் செய்யப்பட்டுள்ளதாகவும், அவர்கள் மீதான விசாரணை தீவிரப்படுத்தப்பட்டுள்ளதாகவும் காவல்துறை தரப்பில் உறுதியளிக்கப்பட்டதையடுத்து, கவினின் உறவினர்கள் போராட்டத்தைக் கைவிட சம்மதித்தனர்.

கவினின் உடல் இன்று அவரது பெற்றோரிடம் ஒப்படைக்கப்பட்டபோது, நகராட்சி நிர்வாகத் துறை அமைச்சர் கே.என். நேரு, மாவட்ட ஆட்சியர் உள்ளிட்டோர் நேரில் சென்று அஞ்சலி செலுத்தினர். அரசின் சார்பில் குடும்பத்திற்கு ஆறுதல் தெரிவிக்கப்பட்டதோடு, இந்த வழக்கில் உரிய நீதி வழங்கப்படும் என உறுதியளிக்கப்பட்டது.

இந்த வழக்கில் முக்கியக் குற்றவாளிகள் மீது கடும் நடவடிக்கை எடுக்கப்படும் என அரசு உறுதிப்படுத்தியுள்ளதால், கவின் குடும்பத்தினர் அமைதியடைந்துள்ளனர். கவினின் மரணம், தமிழகத்தில் ஆணவக் கொலைகளுக்கு எதிரான விவாதங்களை மீண்டும் எழுப்பியுள்ளது.

நிர்வாக ஆசிரியர்- பா.விக்னேஷ்பெருமாள்

WhatsApp Group Join Now