போலீசாருக்கு ஆதரவு...! கடையடைப்பு மற்றும் கண்டனப் போராட்ட அறிவிப்பு..!

by Vignesh Perumal on | 2025-07-04 04:06 PM

Share:

போலீசாருக்கு ஆதரவு...! கடையடைப்பு மற்றும் கண்டனப் போராட்ட அறிவிப்பு..!

தேனி மாவட்டம் தேவதானப்பட்டி காவல் நிலையத்தில் அண்மையில் வெளியான வீடியோ விவகாரத்தில், சம்பந்தப்பட்ட போலீசாருக்கு ஆதரவாக அப்பகுதி வியாபாரிகள் மற்றும் பொதுமக்கள் களம் இறங்கியுள்ளனர். காவல்துறை ஆய்வாளர் மற்றும் நான்கு போலீசார் ஆயுதப்படைக்கு மாற்றப்பட்டதைக் கண்டித்து, விரைவில் கடையடைப்பு மற்றும் கண்டன ஆர்ப்பாட்டம் நடத்தப்படும் என அவர்கள் அறிவித்துள்ளனர்.

கடந்த தைப்பொங்கல் அன்று, தேவதானப்பட்டி பேருந்து நிலையத்தில் ஒரு மதுபோதை ஆசாமி பொதுமக்களுக்கும், போக்குவரத்துக்கும் இடையூறாக நடந்து கொண்டதாகவும், வெளியூர் செல்லும் பெண்களை அச்சுறுத்தியதாகவும் கூறப்படுகிறது. இதைக்கண்ட வணிகர்களும், சமூக ஆர்வலர்களும் காவல் நிலையத்திற்கு தகவல் தெரிவித்துள்ளனர்.

சம்பவ இடத்திற்கு வந்த போலீசார், போதை ஆசாமியை சமாதானப்படுத்தி வீட்டிற்குச் செல்ல அறிவுறுத்தியுள்ளனர். ஆனால், அந்த போதை ஆசாமி போலீசாரையே தாக்கியதாகவும், அங்கிருந்த பொதுமக்களுக்கு கொலை மிரட்டல் விடுத்ததாகவும் வியாபாரிகள் தெரிவிக்கின்றனர். தங்கள் கண்முன்னே நடந்த இந்த அட்டூழியத்தை தட்டி கேட்டு, பொதுமக்களுக்குப் பாதுகாப்பு வழங்க வேண்டிய போலீசாரையே தகாத வார்த்தைகளால் வசைபாடிய போதை ஆசாமியை, காவல் நிலையத்தில் அமர வைத்து போலீசார் தங்கள் பணிகளைச் செய்து கொண்டிருந்தபோதுதான், அந்த போதை ஆசாமி அங்கேயும் பிரச்சனை செய்ய ஆரம்பித்துள்ளான். இந்த சம்பவங்களின் தொகுப்புதான் கடந்த இரண்டு நாட்களாக சமூக வலைத்தளங்களில் வைரலாகி வரும் வீடியோ என்றும் வியாபாரிகள் சுட்டிக்காட்டியுள்ளனர்.

யாரோ சில தனிநபர்களின் தூண்டுதலின் பேரில், சம்பந்தப்பட்ட காவல்துறை ஆய்வாளருக்கும், போலீசாருக்கும் எதிராக வீண் வதந்தியைப் பரப்பியவர்கள் மீது கடும் நடவடிக்கை எடுக்க வேண்டும் என வியாபாரிகள் வலியுறுத்தியுள்ளனர். அமைதியாக இருந்த தேவதானப்பட்டி மக்கள் மீண்டும் பழைய நிலைக்குத் திரும்பவும், குற்றச் சம்பவங்கள் நடைபெறாமல் இருக்கவும், தற்போது மாற்றப்பட்ட காவல் அதிகாரிகளை மீண்டும் தேவதானப்பட்டி காவல் நிலையத்திலேயே பணியமர்த்த வேண்டும் என்றும் வணிகர்களும், சமூக ஆர்வலர்களும், பொதுமக்களும் கடும் எதிர்ப்பைத் தெரிவித்துள்ளனர்.

சம்பந்தப்பட்ட அதிகாரிகளை மீண்டும் தேவதானப்பட்டி காவல் நிலையத்தில் பணியமர்த்தக் கோரி, விரைவில் வணிகர் சங்கங்களின் சார்பாகக் கடையடைப்புப் போராட்டமும், சமூக ஆர்வலர்கள் மற்றும் பொதுமக்கள் சார்பாகக் கண்டன ஆர்ப்பாட்டம் மற்றும் சாலை மறியல் நடைபெறும் என்றும் அவர்கள் அறிவித்துள்ளனர்.

இந்த விவகாரம், காவல்துறையினர் மீதான மக்களின் பார்வையில் வெவ்வேறு கோணங்களை வெளிப்படுத்துவதோடு, ஒரு சமூக நிகழ்வின் மீதான மக்கள் கருத்தின் முக்கியத்துவத்தையும் எடுத்துக்காட்டுகிறது.

நிர்வாக ஆசிரியர்- பா.விக்னேஷ்பெருமாள்.

WhatsApp Group Join Now