ஐ.ஜி-க்கு எதிரான சிபிஐ வழக்கு...! உச்சநீதிமன்றம் அதிரடி ரத்து...!

by Vignesh Perumal on | 2025-04-29 05:46 PM

Share:

ஐ.ஜி-க்கு எதிரான சிபிஐ வழக்கு...! உச்சநீதிமன்றம் அதிரடி ரத்து...!

சிலை கடத்தல் வழக்குகளை விசாரித்து வந்த ஓய்வுபெற்ற ஐ.ஜி. பொன் மாணிக்கவேலுக்கு எதிரான சிபிஐ விசாரணையை நிறுத்தி வைத்த சென்னை உயர் நீதிமன்றத்தின் உத்தரவை உச்ச நீதிமன்றம் இன்று (ஏப்ரல் 29, 2025) ரத்து செய்துள்ளது.

காதர் பாட்ஷா என்பவர் தாக்கல் செய்த மேல்முறையீட்டு மனுவை விசாரித்த உச்ச நீதிமன்ற நீதிபதிகள், சென்னை உயர் நீதிமன்றத்தின் உத்தரவை ரத்து செய்தனர். மேலும், கடத்தப்பட்ட சிலைகள் எங்கே என்று பொன் மாணிக்கவேல் தரப்புக்கு உச்ச நீதிமன்றம் கேள்வி எழுப்பியுள்ளது.

வழக்கு விசாரணையின்போது, பொன் மாணிக்கவேல் தரப்பு வழக்கறிஞர், சிபிஐ விசாரணை தொடர்ந்தாலும் குற்றப்பத்திரிகை தாக்கல் செய்ய தடை விதிக்க வேண்டும் என்று கோரிக்கை வைத்தார். இதற்கு நீதிபதிகள் கடும் கண்டனம் தெரிவித்தனர். "உங்கள் மீது தவறில்லை என்றால், குற்றப்பத்திரிகைக்கு ஏன் தடை கோருகிறீர்கள்?" என்று நீதிபதிகள் கேள்வி எழுப்பினர்.

உச்ச நீதிமன்றத்தின் இந்த உத்தரவு பொன் மாணிக்கவேலுக்கு பின்னடைவாக பார்க்கப்படுகிறது. சிலை கடத்தல் வழக்குகள் தொடர்பாக பொன் மாணிக்கவேல் மீது பல்வேறு குற்றச்சாட்டுகள் நிலுவையில் உள்ளன. சென்னை உயர் நீதிமன்றம் சிபிஐ விசாரணைக்கு தடை விதித்திருந்த நிலையில், தற்போது அந்த தடை நீக்கப்பட்டுள்ளதால் சிபிஐ மீண்டும் விசாரணையை தொடர முடியும்.

இந்த வழக்கு விசாரணை தொடர்ந்து நடைபெற்று வருகிறது. கடத்தப்பட்ட சிலைகள் எங்கு உள்ளன என்பது குறித்து பொன் மாணிக்கவேல் தரப்பு உரிய விளக்கம் அளிக்க வேண்டும் என்று உச்ச நீதிமன்றம் வலியுறுத்தியுள்ளது. இந்த வழக்கின் அடுத்தகட்ட விசாரணை விரைவில் நடைபெறும் என எதிர்பார்க்கப்படுகிறது.

தலைமை செய்தியாளர்-பா.விக்னேஷ்பெருமாள்.

WhatsApp Group Join Now