மாநகராட்சி அலட்சிய போக்கு...! வாகன ஓட்டிகள் அச்சம்...!

by Vignesh Perumal on | 2025-05-01 10:16 AM

Share:

மாநகராட்சி அலட்சிய போக்கு...! வாகன ஓட்டிகள் அச்சம்...!

திண்டுக்கல் நகரின் முக்கியப் பகுதிகளில், குறிப்பாக மேட்டுப்பட்டி சாலையில், உரிமையற்ற மாடுகள் கூட்டமாக சுற்றித் திரிவது வாகன ஓட்டிகளுக்கும் பொதுமக்களுக்கும் பெரும் இடையூறாக உள்ளது. மேய்ச்சலுக்காக விடப்படும் இந்த மாடுகள், அதன் பின்னர் உரிமையாளர்களால் முறையாகக் கட்டுப்படுத்தப்படுவதில்லை என்று அப்பகுதி மக்கள் குற்றம் சாட்டுகின்றனர்.

மேட்டுப்பட்டி பகுதியில் இந்த மாடுகளின் தொல்லை நாளுக்கு நாள் அதிகரித்து வருகிறது. இவை சாலையின் இருபுறமும் மட்டுமல்லாமல், சில நேரங்களில் சாலையின் நடுவேயும் நீண்ட நேரம் அமர்ந்து விடுகின்றன. இதனால் அப்பகுதியில் கடுமையான போக்குவரத்து நெரிசல் ஏற்படுகிறது. அவசர தேவைகளுக்காக செல்லும் வாகனங்கள் கூட மாடுகள் நகரும் வரை காத்திருக்க வேண்டிய சூழ்நிலை உருவாகியுள்ளது.

வாகன ஓட்டிகள் ஒலி எழுப்பும்போது, அமைதியாக இருக்கும் மாடுகள் திடீரென மிரண்டு சாலையில் குறுக்கும் நெடுக்குமாக ஓடுகின்றன. இதனால் இரு சக்கர வாகன ஓட்டிகள் மற்றும் பாதசாரிகள் விபத்துகளில் சிக்கும் அபாயம் ஏற்பட்டுள்ளது. சமீபத்தில் கூட இப்பகுதியில் மாடுகள் குறுக்கே வந்ததால் சிறு விபத்துகள் நிகழ்ந்ததாக அப்பகுதி மக்கள் தெரிவிக்கின்றனர்.

இந்த பிரச்சனை குறித்து அப்பகுதி பொதுமக்கள் பலமுறை சம்பந்தப்பட்ட அதிகாரிகளுக்கு தெரிவித்தும் எந்தவிதமான நடவடிக்கையும் எடுக்கப்படவில்லை என்று கூறப்படுகிறது. மாடுகளின் உரிமையாளர்கள் தங்கள் பொறுப்பை உணர்ந்து கால்நடைகளை முறையாகக் கட்டுப்படுத்த வேண்டும் என்றும், மாநகராட்சி நிர்வாகம் உடனடியாக தலையிட்டு சாலைகளில் சுற்றித்திரியும் மாடுகளைப் பிடித்து அப்புறப்படுத்த வேண்டும் என்றும் பொதுமக்கள் கோரிக்கை விடுத்துள்ளனர்.

மேலும், இதுபோன்ற அலட்சியமான செயல்களில் ஈடுபடும் மாடுகளின் உரிமையாளர்கள் மீது உரிய அபராதம் விதிக்க வேண்டும் என்றும் அவர்கள் வலியுறுத்தியுள்ளனர். விபத்துகள் ஏற்படும் முன் மாநகராட்சி நிர்வாகம் விரைந்து நடவடிக்கை எடுக்காவிட்டால், பொதுமக்கள் போராட்டத்தில் ஈடுபட நேரிடும் என்றும் எச்சரித்துள்ளனர்.

திண்டுக்கல் நகரின் முக்கிய சாலையில் மாடுகள் தொல்லை அதிகரித்திருப்பது குறித்து மாநகராட்சி நிர்வாகம் என்ன நடவடிக்கை எடுக்கப் போகிறது என்பதை பொதுமக்கள் உற்றுநோக்கி வருகின்றனர்.

தலைமை செய்தியாளர்-பா.விக்னேஷ்பெருமாள்.

WhatsApp Group Join Now