முன்னாள் ஐஆர்எஸ் அதிகாரிக்கு தவெக-வில் முக்கிய பதவி...! இவர் யார் தெரியுமா...?

by Vignesh Perumal on | 2025-06-09 01:15 PM

Share:

முன்னாள் ஐஆர்எஸ் அதிகாரிக்கு தவெக-வில் முக்கிய பதவி...! இவர் யார் தெரியுமா...?

நடிகர் விஜய் தலைமையிலான தமிழக வெற்றிக் கழகத்தில் (தவெக) முன்னாள் இந்திய வருவாய் பணி (ஐஆர்எஸ்) அதிகாரியான அருண்ராஜ், இன்று அதிகாரப்பூர்வமாக இணைந்தார். இவருக்கு தவெகவின் கொள்கை பரப்பு பொதுச்செயலாளர் பதவி வழங்கப்பட்டுள்ளதாக அறிவிக்கப்பட்டுள்ளது. இந்த இணைப்பு, தமிழக அரசியலில் பெரும் கவனத்தைப் பெற்றுள்ளது.

மருத்துவப் படிப்பு முடித்து, பின்னர் யுபிஎஸ்சி தேர்வில் தேர்ச்சி பெற்று ஐஆர்எஸ் அதிகாரியாகப் பணியாற்றியவர் அருண்ராஜ். கடந்த 2009 ஆம் ஆண்டு முதல் தமிழகத்தில் வருமான வரித்துறையில் பல்வேறு முக்கியப் பொறுப்புகளை வகித்து, அண்மையில் பீகாருக்கு மாற்றப்பட்டார். சில நாட்களுக்கு முன்பு தனது ஐஆர்எஸ் பதவியை விருப்ப ஓய்வு பெற்று ராஜினாமா செய்திருந்தார். அவரது ராஜினாமா மத்திய அரசால் ஏற்றுக்கொள்ளப்பட்டது.

நடிகர் விஜய் தமிழக வெற்றிக் கழகத்தைத் தொடங்கியதில் இருந்து அருண்ராஜ் அவருக்கு அரசியல் ஆலோசகராகவும், கட்சியின் பல்வேறு வியூகங்களை வகுப்பதிலும் முக்கியப் பங்காற்றி வந்ததாகத் தகவல்கள் தெரிவிக்கின்றன. இந்நிலையில், இன்று சென்னை பனையூரில் உள்ள தவெக தலைமை அலுவலகத்தில் நடிகர் விஜய் முன்னிலையில் அருண்ராஜ் கட்சியில் இணைந்தார்.

கட்சியில் இணைந்த அருண்ராஜுக்கு தவெகவின் கொள்கை பரப்பு பொதுச்செயலாளர் பதவி வழங்கப்பட்டுள்ளது. இது, தமிழக வெற்றிக் கழகத்தின் முக்கியப் பதவிகளில் ஒன்றாகும். அருண்ராஜின் கல்வித் தகுதியும், அரசுப் பணியில் பெற்ற அனுபவமும், அவரது பேச்சுத் திறனும் இந்தப் பதவிக்கு உகந்ததாகக் கருதப்படுகின்றன.

2026 சட்டமன்றத் தேர்தலை இலக்காகக் கொண்டு நடிகர் விஜய் தனது தமிழக வெற்றிக் கழகத்தை வலுப்படுத்தும் பணிகளில் தீவிரமாக ஈடுபட்டுள்ளார். கட்சியின் அடிப்படை கட்டமைப்பை வலுப்படுத்துவதுடன், பல்வேறு கட்சிகளில் இருந்து முக்கிய நிர்வாகிகளையும், அனுபவம் வாய்ந்த நபர்களையும் கட்சியில் இணைத்து வருகிறார். ஏற்கனவே, பிரபல பேச்சாளர் ராஜ்மோகன் கொள்கை பரப்புச் செயலாளராகவும், விசிகவிலிருந்து விலகிய ஆதவ் அர்ஜுனா, பாஜக - அதிமுகவிலிருந்து விலகிய சி.டி.ஆர். நிர்மல் குமார் போன்றோர் தவெகவில் இணைந்துள்ளனர்.

அருண்ராஜின் வருகை, தவெகவின் கொள்கை வகுத்தல் மற்றும் அதனை மக்கள் மத்தியில் கொண்டு செல்வதில் முக்கியப் பங்காற்றும் என எதிர்பார்க்கப்படுகிறது. முன்னாள் சட்டமன்ற உறுப்பினர்கள் ராஜலட்சுமி, ஸ்ரீதரன், ஓய்வு பெற்ற நீதிபதி சுபாஷ் போன்றோரும் இன்று தவெகவில் இணைந்ததாகத் தகவல்கள் வெளியாகியுள்ளன. இந்த தொடர்ச்சியான இணைப்புகள், தமிழக அரசியலில் தவெகவின் செல்வாக்கை மேலும் அதிகரிக்கும் என்று அரசியல் நோக்கர்கள் கருதுகின்றனர்.

நிர்வாக ஆசிரியர்- பா.விக்னேஷ்பெருமாள்.

WhatsApp Group Join Now