கேளிக்கை வரி குறைப்பு..! தமிழக அரசு அரசாணை வெளியீடு...!

by Vignesh Perumal on | 2025-05-30 08:58 PM

Share:

கேளிக்கை வரி குறைப்பு..! தமிழக அரசு அரசாணை வெளியீடு...!

தமிழ்நாட்டில் திரைப்படங்களுக்கு விதிக்கப்பட்டு வந்த உள்ளாட்சி அமைப்பு கேளிக்கை வரி (Local Body Entertainment Tax - LBET) 8 சதவீதத்தில் இருந்து 4 சதவீதமாகக் குறைத்து தமிழக அரசு அரசாணை வெளியிட்டுள்ளது. திரைப்படத் துறையினரின் நீண்டகால கோரிக்கையை ஏற்று இந்த நடவடிக்கையை தமிழக அரசு மேற்கொண்டுள்ளது. அரசின் இந்த அறிவிப்பு திரையுலகினர் மத்தியில் பெரும் வரவேற்பைப் பெற்றுள்ளது.

தமிழகத்தில் ஆண்டுதோறும் ஏராளமான படங்கள் வெளியாகி வரும் நிலையில், இந்த படங்களுக்கான டிக்கெட் கட்டணத்தில் உள்ளாட்சி அமைப்பு கேளிக்கை வரியாக 8 சதவீதம் வசூலிக்கப்பட்டு வந்தது. இந்த வரி விகிதம் மிகவும் அதிகமாக உள்ளதாகவும், இதனால் குறிப்பாக சிறிய பட்ஜெட் திரைப்படங்கள் பெரும் நிதிச் சுமையை எதிர்கொண்டு வருவதாகவும் திரைப்படத் துறையினர் தொடர்ந்து தமிழக அரசுக்குக் கோரிக்கை விடுத்து வந்தனர்.

திரைப்படத் துறையினரின் இந்த கோரிக்கையைப் பரிசீலனை செய்த தமிழக அரசு, தற்போது கேளிக்கை வரியைக் குறைத்து அரசாணையை வெளியிட்டுள்ளது. இதன்மூலம், இனி திரைப்படங்களுக்கான உள்ளாட்சி அமைப்பு கேளிக்கை வரி 4 சதவீதமாக வசூலிக்கப்படும்.

இந்த வரி குறைப்பு, திரைத்துறைக்கு ஒரு பெரிய நிவாரணமாக அமையும் என எதிர்பார்க்கப்படுகிறது. குறிப்பாக, தயாரிப்பாளர்களின் சுமையைக் குறைக்கவும், திரையரங்குகளுக்கு மீண்டும் ரசிகர்களை ஈர்க்கவும் இந்த நடவடிக்கை உதவும் என்று திரைப்படத் துறையினர் நம்பிக்கை தெரிவித்துள்ளனர். ஒன்றிய அரசின் ஜிஎஸ்டி வரிகளால் தமிழ்த் திரைத்துறை ஏற்கனவே பல்வேறு நெருக்கடிகளைச் சந்தித்து வரும் நிலையில், மாநில அரசின் இந்த வரி குறைப்பு, திரைத்துறையின் வளர்ச்சிக்கு வழிவகுக்கும் எனப் பலரும் கருத்து தெரிவித்துள்ளனர்.

தென்னிந்திய நடிகர் சங்க துணைத்தலைவர் நடிகர் கருணாஸ் உள்ளிட்ட பல திரைப்பிரபலங்கள் தமிழக அரசின் இந்த நடவடிக்கைக்கு நன்றி தெரிவித்துள்ளனர். இது திரையுலகிற்கு ஒரு மகிழ்ச்சியான மற்றும் வரவேற்கத்தக்க செய்தி என்றும், தயாரிப்பாளர்களுக்கு பெரும் சுமை குறைப்பு என்றும் அவர்கள் குறிப்பிட்டுள்ளனர். மேலும், தொழில்நுட்ப வளர்ச்சியால் வீடுகளிலேயே திரைப்படங்களை பார்க்கும் பழக்கத்திற்கு மாறியுள்ள ரசிகர்களை மீண்டும் திரையரங்குகளை நோக்கி அழைத்து வரும் ஒரு நல்ல மாற்றமாகவும் இந்த கேளிக்கை வரி குறைப்பு அமையும் என்றும் அவர்கள் நம்புகின்றனர்.

நிர்வாக ஆசிரியர்-பா.விக்னேஷ்பெருமாள்.

WhatsApp Group Join Now