சிறுமி உயிரிழப்பு...! சட்டவிரோத கருக்கலைப்பு...! செவிலியர் உட்பட இருவர் கைது...!

by Vignesh Perumal on | 2025-08-28 01:25 PM

Share:

சிறுமி உயிரிழப்பு...! சட்டவிரோத கருக்கலைப்பு...! செவிலியர் உட்பட இருவர் கைது...!

திருத்தணியைச் சேர்ந்த ஒரு சிறுமி, ஆந்திராவில் சட்டவிரோதமாகக் கருக்கலைப்பு செய்ததால் உடல்நலம் பாதிக்கப்பட்டு உயிரிழந்த சம்பவம் பெரும் சோகத்தை ஏற்படுத்தியுள்ளது. இது தொடர்பாக, கருக்கலைப்பு செய்த ஆந்திர செவிலியர் உட்பட இருவரைப் போலீசார் கைது செய்துள்ளனர்.

திருத்தணி அருகே வசித்து வந்த 17 வயது சிறுமி கர்ப்பமாகியுள்ளார். இதையடுத்து, திருத்தணியைச் சேர்ந்த ஹரிபாபு (35) என்பவர், சிறுமியை ஆந்திர மாநிலம் நகரிக்கு அழைத்துச் சென்றுள்ளார். அங்கு, செவிலியராகப் பணிபுரியும் வயலட் கனி (50) என்பவர், சிறுமிக்கு சட்டவிரோதமாகக் கருக்கலைப்பு செய்துள்ளார்.

கருக்கலைப்புக்குப் பிறகு சிறுமியின் உடல்நிலை மோசமடைந்தது. கடுமையான ரத்தப்போக்கு ஏற்பட்டதால், உடனடியாகத் திருவள்ளூரில் உள்ள அரசு மருத்துவமனைக்குச் சிகிச்சைக்காக அழைத்து வரப்பட்டுள்ளார். எனினும், சிகிச்சை பலனின்றி அந்தச் சிறுமி பரிதாபமாக உயிரிழந்தார்.

சிறுமி இறந்ததையடுத்து, மருத்துவமனை நிர்வாகம் போலீசாருக்குத் தகவல் தெரிவித்தது. விசாரணையில், ஆந்திராவில் சட்டவிரோதமாகக் கருக்கலைப்பு நடந்ததும், ஹரிபாபு மற்றும் வயலட் கனி ஆகியோருக்கு இதில் தொடர்பு இருப்பதும் தெரியவந்தது.

இதையடுத்து, போலீசார் வழக்குப்பதிவு செய்து, இருவரையும் கைது செய்தனர். இது போன்று சட்டவிரோதமாகக் கருக்கலைப்பு செய்யும் நபர்கள் குறித்துப் போலீசார் தீவிர விசாரணை நடத்தி வருகின்றனர்.

சிறுமி உயிரிழந்த சம்பவம், அப்பகுதியில் பெரும் சோகத்தையும், அதிர்ச்சியையும் ஏற்படுத்தியுள்ளது.

ஆசிரியர்கள் குழு....

WhatsApp Group Join Now