கூமாபட்டிக்கு ₹10 கோடி ஒதுக்கீடு...! அரசு அரசாணை வெளியீடு...!

by Vignesh Perumal on | 2025-08-28 01:17 PM

Share:

கூமாபட்டிக்கு ₹10 கோடி ஒதுக்கீடு...! அரசு அரசாணை வெளியீடு...!

சமூக வலைதளங்களில் பிரபலமடைந்த விருதுநகர் மாவட்டம், கூமாபட்டி சுற்றுலாத்தலத்தை மேம்படுத்த ₹10 கோடி நிதி ஒதுக்கி, தமிழக அரசு அரசாணை வெளியிட்டுள்ளது. இந்த அறிவிப்பு அப்பகுதி மக்கள் மற்றும் சுற்றுலா ஆர்வலர்கள் மத்தியில் பெரும் மகிழ்ச்சியை ஏற்படுத்தியுள்ளது.

கடந்த சில மாதங்களாக, கூமாபட்டி மற்றும் அதன் அருகிலுள்ள பிளவக்கல் அணைப் பூங்கா பகுதி, சமூக வலைதளங்களில் வைரலாகப் பரவியது. உள்ளூர் இளைஞர் ஒருவர் பதிவிட்ட வீடியோக்கள் மூலம், இந்தப் பகுதியின் இயற்கை அழகு பலரது கவனத்தையும் ஈர்த்தது. இதன் காரணமாக, உள்நாட்டு சுற்றுலாப் பயணிகளின் வருகை அதிகரித்தது.

இந்த எதிர்பாராத பிரபலம், கூமாபட்டியின் சுற்றுலா உள்கட்டமைப்பை மேம்படுத்த வேண்டும் என்ற கோரிக்கையை வலுப்படுத்தியது. இது குறித்துப் பொதுமக்கள், சமூக ஆர்வலர்கள் மற்றும் அரசியல் தலைவர்கள் அரசுக்குக் கோரிக்கை விடுத்தனர்.

இந்தக் கோரிக்கைகளுக்குச் செவிசாய்த்த தமிழக அரசு, விருதுநகரில் நடைபெற்ற அரசு விழாவில், கூமாபட்டி பிளவக்கல் அணைப் பூங்காவை மேம்படுத்த நிதி ஒதுக்கீடு செய்யப்படும் என்று முதலமைச்சர் மு.க. ஸ்டாலின் அறிவித்திருந்தார். இந்த அறிவிப்பைச் செயல்படுத்தும் விதமாக, தற்போது ₹10 கோடி நிதி ஒதுக்கி, அதற்கான அரசாணையை தமிழக அரசு வெளியிட்டுள்ளது.

இந்த நிதி மூலம், அணைப் பூங்காவை மேம்படுத்தும் பணிகள் விரைவில் தொடங்கும் என எதிர்பார்க்கப்படுகிறது. இந்தப் புதிய வசதிகள், கூமாபட்டியை ஒரு முக்கிய சுற்றுலா மையமாக மாற்றும் என நம்பப்படுகிறது.

நிர்வாக ஆசிரியர்- பா.விக்னேஷ்பெருமாள்

WhatsApp Group Join Now