ஏராளமான விருதுகள்...! கோலாகல கொண்டாட்டம்...! மகிழ்ச்சி வெள்ளத்தில் மக்கள்....!

by Vignesh Perumal on | 2025-08-15 02:33 PM

Share:

ஏராளமான விருதுகள்...! கோலாகல கொண்டாட்டம்...! மகிழ்ச்சி வெள்ளத்தில் மக்கள்....!

இந்தியாவின் 79வது சுதந்திர தின விழா திண்டுக்கல் மாவட்ட விளையாட்டு மைதானத்தில் மிகுந்த உற்சாகத்துடன் கொண்டாடப்பட்டது. மாவட்ட ஆட்சியர் திரு. செ. சரவணன், இ.ஆ.ப., அவர்கள் தேசியக் கொடியை ஏற்றி வைத்து மரியாதை செலுத்தினார். இந்த நிகழ்வில், சிறப்பாகப் பணியாற்றிய அரசு அலுவலர்கள் கௌரவிக்கப்பட்டனர், மேலும் பயனாளிகளுக்கு நலத்திட்ட உதவிகள் வழங்கப்பட்டன.

காலை 9:05 மணிக்கு, மாவட்ட ஆட்சியர் திரு. செ. சரவணன் தேசியக் கொடியை ஏற்றி வைத்தார். பின்னர், அவர் காவல்துறை, தீயணைப்புத்துறை மற்றும் ஊர்க்காவல் படையினரின் அணிவகுப்பை ஆய்வு செய்து மரியாதை ஏற்றுக் கொண்டார். இந்த நிகழ்வில், மாவட்ட காவல் கண்காணிப்பாளர் மரு. அ. பிரதீப் மற்றும் மாவட்ட வருவாய் அலுவலர் திருமதி இரா. ஜெயபாரதி ஆகியோர் உடன் இருந்தனர்.

விடுதலைப் போராட்ட தியாகிகளுக்கு மரியாதை செலுத்தும் விதமாக, சமாதானத்தின் அடையாளமாக வெண்புறாக்களையும், வண்ண பலூன்களையும் மாவட்ட ஆட்சியர் பறக்கவிட்டார்.

சமூகத்திற்கு சிறப்பாகப் பணியாற்றிய அரசு அலுவலர்களின் பங்களிப்பை அங்கீகரிக்கும் வகையில், மாவட்ட ஆட்சியர் பாராட்டுச் சான்றிதழ்கள் மற்றும் பதக்கங்களை வழங்கினார்.

மேலும், 133 காவல்துறை அதிகாரிகள், 5 நீதித்துறை அதிகாரிகள் மற்றும் பிற அரசுத் துறைகள், வருவாய், ஊரக வளர்ச்சி, சுகாதாரம், கல்வி, வனத்துறை, போக்குவரத்து உள்ளிட்ட பல்வேறு துறைகளைச் சேர்ந்த 276 அதிகாரிகள் கௌரவிக்கப்பட்டனர்.

சுதந்திர தின விழாவின் ஒரு பகுதியாக, பல்வேறு அரசுத் துறைகள் மூலம் மொத்தம் 109 பயனாளிகளுக்கு ரூ.2.20 கோடி மதிப்பிலான நலத்திட்ட உதவிகள் வழங்கப்பட்டன. இந்த உதவிகள் மக்களின் வாழ்க்கைத் தரத்தை மேம்படுத்த உதவும் வகையில் அமைந்தன.

விழாவிற்கு மேலும் மெருகூட்டும் வகையில், ஐந்து பள்ளிகளைச் சேர்ந்த 292 மாணவ, மாணவிகள் தங்களின் திறமைகளை வெளிப்படுத்தும் வகையில் கண்கவர் கலைநிகழ்ச்சிகளை வழங்கினர். திண்டுக்கல் அரசு பெண்கள் மேல்நிலைப்பள்ளி, புனித வளனார் பெண்கள் மேல்நிலைப்பள்ளி, வாசவி மெட்ரிக் மேல்நிலைப்பள்ளி, ஒட்டன்சத்திரம் பட்ஸ்புளோரசிங் மெட்ரிக் மேல்நிலைப்பள்ளி மற்றும் எம்.எஸ்.பி. சோலை நாடார் மேல்நிலைப்பள்ளி ஆகிய பள்ளிகளின் மாணவர்கள் இந்த நிகழ்ச்சிகளில் பங்கேற்றனர். நிகழ்ச்சியில் பங்கேற்ற அனைத்து மாணவர்களுக்கும் பரிசுகள் வழங்கப்பட்டன.

விழாவிற்கு முன்னதாக, மாவட்ட ஆட்சியர், முதன்மைக் கல்வி அலுவலர் அலுவலக வளாகத்தில் உள்ள அண்ணல் மகாத்மா காந்தி அவர்களின் திருவுருவச் சிலைக்கு மாலை அணிவித்து மரியாதை செலுத்தினார்.

இந்த விழாவில், அரசு உயர் அலுவலர்கள், பொதுமக்கள், மாணவ, மாணவிகள் எனப் பலரும் கலந்து கொண்டு நாட்டின் 79வது சுதந்திர தினத்தை கொண்டாடினர்.

நிர்வாக ஆசிரியர்- பா.விக்னேஷ்பெருமாள்

WhatsApp Group Join Now